“དྲ་རྒྱ་མ་དར་བའི་སྔོན་དུ་སྤྱི་ཚོགས་ཀྱི་གནད་དོན་གང་རུང་ལ་དཔྱད་བརྗོད་དང་བགྲོ་གླེང་བྱ་རྒྱུ་ནི་ལས་སླ་བོ་ཞིག་མིན།དེ་དུས་མི་རྣམས་ཀྱིས་ཚགས་པར་དང་དུས་དེབ་སོགས་ཀྱི་སྟེང་དུ་དཔྱད་བརྗོད་སྤེལ་གྱི་ཡོད་ཅིང་།དེ་ཡང་ཁྱབ་རྒྱ་ཆུང་ཞིང་སྤྱི་ཚོགས་སྟེང་འགྲེམས་སྤེལ་བྱེད་རྒྱུར་ཡང་ཧ་ཅང་འགོར་གྱི་ཡོད།དེང་སྐབས་དྲ་རྒྱ་ཡོད་པས་སྟབས་ཀྱིས་སྤྱི་ཚོགས་སྟེང་གི་མི་ཚང་མ་གསར་འགོད་པ་ཡིན་ཞིང་།ཁ་པར་དང་རྩིས་འཕྲུལ་སོགས་མི་རེ་རེའི་ལག་ན་སོ་སོའི་རིག་གཞུང་གི་ལྟ་བ་དང་སྤྱི་ཚོགས་ཀྱི་བསམ་ཚུལ་འདོན་སྤེལ་བྱ་སའི་གླེང་སྟེགས་རེ་ཡོད་པ་འདི་ནི་སྤྱི་ཚོགས་ཡར་སྐུལ་གྱི་མཐུན་རྐྱེན་ཆེན་པོ་ཞིག་ཏུ་གྱུར་ཡོད།དཔེར་ན་རེབ་གོང་ཟམ་ཆེན་གྱི་སྟེང་དུ་བོད་ཡིག་གི་སྒོ་བྱང་འགོད་དུ་བཅུག་པ་དང་ཀན་སུའུ་མི་རིགས་དཔེ་སྐྲུན་ཁང་གིས་ཨ་ཆེན་གངས་རྒྱབ་ཀྱི་གློག་བརྙན་ལ་ལོག་འགྲེལ་བྱས་པའི་བསླབ་དེབ་འགྲེམ་རྒྱུ་མཚམས་འཇོག་བྱེད་དུ་བཅུག་པ་ལ་སོགས་པའི་འགྱུར་བ་སྣ་ཚོགས་ཤིག་སྐད་འཕྲིན་སོགས་དྲ་བ་བརྒྱུད་མི་མང་པོ་ཞིག་གིས་གནད་དོན་དེ་དག་གླེང་སློང་དང་བརྒྱུད་བསྐུར་བྱས་པའི་གྲུབ་འབྲས་ལ་བརྟེན་ནས་བྱུང་བ་ཡིན་པས།སྤྱི་ཚོགས་ལ་འགྱུར་བ་ཆེན་པོ་ཞིག་གཏོང་དགོས་ན་ང་ཚོ་མི་སྒེར་བ་རེ་རེའི་མཉམ་ཞུགས་ནི་མེད་དུ་མི་རུང་ངོ།”